HƏDƏR OLAN ÖMÜRLƏR...
Cavid Memmedli 05/12/2012
Mən
buralı deyiləm. Qınasanız, qınamasanız da. İşi gücü yeyib-içmək, hər şeyə göz
yummaq və necə alındı öz günlərini yaşamaq olan insanlarla mənim bölüşdüyüm sadəcə
bir şey var – eyni şəhərdə yaşamaq. Onların həyatı, mənə görə bir faciədir. Mənasız
həyat yaşayıb, hər gün ölümə doğru bir addım yaxınlaşırlar. Allahın mərhəməti
sonsuzdur amma, mən o mərhəmətin bəzi insanlar üçün o qədər də sonsuz olmasını
heç də istəməzdim. Başqasının hüzurunu qaçıran, amma bunu vecinə almayan,
yaxşı-pis ölçüsünü “mənim-mənim olmayan” ölçüsü ilə dəyişdirən insanın canı cəhənnəmə....
Nə qanım, nə dilim nə də ki inancım onunla ortaq ola bilməz.
Abbas
Səhhətin danışdığı hekayələrin birisinə görə, bir gün erməni gənclərin Avropada
oxuması üçün ianə toplanırmış; qoca, sonsuz və yoxsul bir erməni, o günə kimi
topladığı üç min rublu bu işə bağışlamış. Beləliklə həmin bəyənmədiyimiz erməni,
öz kasıb həyatını uca bir məqsədə həsr elədiyi üçün, əslində ucalmış və həyatına
yücə məna qatmışdı. Bu hekayə bir çox Azərbaycanlıya dərs ola bilsəydi, onlar
yaşadıqları bu çirkabdan bəlkə də xilas olardılar.
Bəzən
birisi xalqımızı söyəndə, deyirəm ki, eləmə, söymə. Bədbəxtin nəyini söyəsən?
Onsuzda o özünə hər gün söyür... Məsələn palçıqlı küçələri gəzib bundan kefini
pozmayan məxluq yığını nədir, siz qərar verin. Ya da ki, çiçəkləri tərk edib
zibilliyi üstün tutanlar necə? Sübutsuz danışmaq mənlik deyil; vətəndaşımız
binanın altında çiçək əkdirməkdənsə, ora zibil atmağı üstün sayır. Zibil atana
da səsini çıxarmır. Alçaqlıq və zəlilliyin ən bariz nümunəsi.
Deyiblər
ki, yaxşının düşməni, mükəmməl olandır. Mən mükəmməlin arxasında qaçmadım.
Lakin bir ideal olaraq onu ağlımda tutdum. Xəyalımız mükəmməldə olmasa, yaxşını
da əldə etmək çətinləşər.
Həyat
qəribə bir yarışdır. Rəqiblərin də müxtəlifdir. Mənim rəqiblərim daim hədəflərim
oldu. İnsanları rəqib görmədim. Nəfsim paxıl da oldu, lakin sahib olduğum
eqoizmin da mükəmməlliyi, rəqib insanları bütöv olan halın sadəcə bir elementi
kimi ifadə etdiyi üçün, insanlar ağlıma Türklər demişkən takılmazdı. Nailiyyətlərim
də oldu, uduzdum da. Amma bir bütöv olaraq, overall demişkən, həyatda
uduzduğumu fikirləşirəm. Bəlkə talehimdə - cəhd etsəydim – dünyanı dəyişmək
olardı. Bəlkə də digərlərin gözlərini sevinclə doldura biləcəyim işlərim olardı.
Bəlkə bu tenimdən sıyrılıb, ölümsüz məqsədlər üçün yaratmaq olardı. Nə var ki mən
sadəcə bir müşahidəçi, hadisələri yaradan yox, onları sadəcə seyredən
oldum. Halbuki insan bu dünyaya,
yaratmaq, yüksəlmək, yüksəldikçə də ərimək üçün gəlib.
Qoca
atam can ayağındadır. Hər gün biraz daha əriyir, halsız olur. Halını soruşanda,
verdiyi cavab mənalıdır: "hələ ki nəfəs alıram, oğul". Talehinə boyun
əyib, səmimi qəlb ilə Allaha qovuşmaq istəyir. Artıq o ölümə hazırdır, xəstəliyinə
görə üsyan etməyib, bu dünyaya əlvida demək istəyir. amma gözləri hələ də
canlıdır. Gözləri sönməyib. Lakin bədəni, artıq işləməz hala gəlib, getdikçə
sıradan çıxır. Az əvvəl qoluna girib onu yatağına götürdüm. Həyatın bu
dövrü-daimi göz qabağında olanda, hadisələrə başqa zaviyədən baxırsan. Bir gün
- oğlum yanımda olsa - o da qoluma girəcək və son nəfəslərimi alacağım o ölüm
döşəyinə götürəcək.
Zamanı
durdurmaq əlimizdə deyil. Halbuki dursaydı, tələsmədən, düşünərək bir çox işi
yoluna qoyub, bəlkə də hüzur tapardıq. Birdə ki, düşünməkdən sıyrılıb, hərəkətə
keçməklə tarix yazardıq. Dəyişən nəsə olmur, siz tələsmədən – sanki zamanı
durduraraq, - işinizə davam edin.
Mən
gənclərimizə çox inanıram. Bu ölkədə əsas ümidim onlardır. Baxışlarında bir
saflıq və aydınlıq var. Bir də axtarış həyəcanı. Onlara acıyıram da, mühitə görə.
Lakin yenə də ümidliyəm. Yoxsa Universitet auditoriyasının sıxıntısını çəkmək çətin
olardı.
Savaşmağı
sevmirəm, amma ona məhkumam. Məhkumam çünki var olanla kifayət etməyib, daha
yaxşısını istəmişəm. Istəməliyəm də. Istəməliyik də. Savaşmalıyıq: tərbiyyəsizlik,
mədəniyyətsizlik, cəhalət və cılızlıqla. Məddahlığa tüpürüb həqiqəti
qoxlamalıyıq. Kəsiləcək barmağımız varsa əlimizi uzatmalıyıq. Bir yerdə daha
güclüyük. Birləşməliyik, lakin sadəcə fikirdə deyil, hərəkətdə. Bu Ölkə, bu Vətən,
mənimdir, onların deyil. Biz bura Vətəni mənimsəməyə yox, ona xidmət etməyə gəldik.
Onlar çürüyüb gedəcək, mən isə daim olacam. Sən də gəl yanıma, sən də dur
yanımda. Bari yorulanda, yaslanacığımız, təsəlli alacağımız dostumuz olsun.
Yazan: Dr. Fərhad Mehdiyev (Hüquq elimləri namizədi, Azərbaycan Respublikasının Vəkillər kollegiyasının üzvü, beynəlxalq qanunvericilik üzrə ekspert, Qafqaz Universitetinin beynəlxalq hüquq kafedrasının müdiri)