Musiqiylə Sevişən Sevdiyim!
Cavid Memmedli 29/08/2013
Qarmaqarışıq
hisslərlə dolu yaz günü idi. Həmişəki kimi, qaçhaqovda işdən çıxıb oğlumu dərsdən
götürməyə tələsirdim. Yolda bir kiçik qəza da keçirdim. Ağlamsındım, sanki sitəm
etdim bir anlıq, içimdən sərhədsiz bir çığırtı qopdu... Elə bu çığırtıyla yenidən
özümə gəldim, yoluma davam etdim. Tək dərdim oğlumun keçirəcəyi narahatlıq və
qorxu idi. O, çox ürkək uşaqdır. Bir dəfə yenə unutduğum bir səbəbdən
onu dərsdən götürməyə gedərkən gecikmək məcburiyyətində qalmışdım. Dərsi saat
altıda bitirdi. Qış olduğundan hava tez qaralmışdı. Mən məktəbə çatanda
qapıçıdan və ürkək baxışlarla məktəb qapısının pəncərəsindən ora-bura
boylanaraq gözü anasını axtaran oğlumdan başqa bir kəs yox idi. Məni görcək
yüyürə-yürürə boynuma sarılıb, “Ana, elə bildim gəlməyəcəksən”- deməsi hələ də
qulaqlarımda cingildəyir, ölənə qədər dә bu cingiltini unutmayacağıma əminəm.
Özümə bağışlaya bilmədiyim şeyləri heç vaxt unutmuram çünki...
Bu dəfə nə hava
qaralmışdı, nə də qış günü deyildi. Həm də müəlliməsiylə danışmışdım,
yanındaydı. Həmin gün sinif uşaqlarıyla Novruz bayramı keçirmişdilər. O, elə
hey bayram şənliyi təәsuratından böyük şövq ilə danışır, mənsə onun “Ana, niyə
gec gəldin..?” cümləsiylə həmin günə qayıtmışdım. sanki ondan üzr istəməyin,
bağışlanmanın yolunu axtarırdım. Elə tapmışdım da. -Acsan? -Yox -Hmm, mən də
bayram şərəfinə yaxınlıqdakı restoranların birində oğluma qonaqlıq verim
demişdim...
Ona uşaq yox,
bir şəxsiyyət kimi yanaşmam həmişə xoşuna gəlib. Uşaqlarla heç vaxt “uşaqsan,
uşaq işinlə məşğul ol” tipli tərbiyə vasitəsini dəstəkləməmişəm. Bu səbəbdən o
bütün uşaqlardan həmişə seçilib. Mədəni və fərqliliyi ilə. Bəlkə də mənim
oğlumdur deyə, bu mənə belə gəlib.
-Hə, hə, ana,
gedək xahiş edirəm.
Onun xoşuna gələcəyini
və belə cavab verəcəyini bilirdim. Ana-bala türk restoranlarının birində söhbətləşə,
deyə-gülə yeyib-içdik.
Evin yolunu
tutub maşruta mindik. Budur, artıq evdəyik. Qonaqlarımız da var. Oğlumun nənəsi
gözəl süfrə açıb, deyəsən elə doğurdan da qaynanam məni sevir.“Yeməyə indi
başlamışıq, əl-üzünüzü yuyub gəlin süfrəyə” dedi. Qonaqlarımız da ərimin
xalasıgildir. Çox mədəni, musiqiçi ailəsidirlər. Bu vaxt həyat yoldaşım da
özünü işdən evə yetirdi. Hamımız bu şən söhbətli süfrə arxasında əyləşdik.
Qaynanamın qayğı ilə “ye də, ye”, oğlumunsa kiçik ana-bala qonaqlığımızı
danışıb “biz doymuşuq” deməsi və onların təbəssümü məni xoşbəxt edirdi. Bir ara
öz fikrimdə bu qədər xoşbəxt ailəm olduğu üçün və doğru seçimimə görə özümlə
qürur duydum. Mən xoşbəxtlik sözünün bütöv mənasında onun var oluşuna
inanmıram. Bir qadın üçün uğurlu iş və sevgi dolu ailə onun adı, həyatda mövcud
olmayan bir söz, məsələn, \"sqmbxot\" və ya \"xoşbəxtlik\"
olması heç fərq etməz. Hər nədirsə, o məndə var.
Masanı
yığışdırdıq və hamı yeməkdən sonra piano arxasına yığışdı. Xalamızın yoldaşı isə
ifaya başladı. Hər kəs özünə əyləşəcək bir yer tapmışdı. Mən qaynanamın əyləşdiyi
kreslonun, şıltaq uşaqlar kimi, böyür qolunda oturmuşdum. Həyat yoldaşımsa əlini
çiynimə qoyub, musiqi sədəları altında baxışlarıyla məni süzürdü. Göz bəbəkləriylə
üz-gözümə sığal çəkdiyini hiss edirdim sanki. Pianoda müxtəlif klassik müsiqilər
ifa olunurdu, bayaqdan içimi didən bu qarmaqarışıq hisslərin nə olduğuna cavab
axtarırdım... Kövrəlmişdim... Eyni zamanda ailəmlə xoşbəxtdim və beynimdə “Mən
nəyi xatırlamaqda çətinlik çəkirəm?” sualı gəzişirdi. Son səslənən müsiqidə
gözümdən iki damla yaş gəldi və axtardığım cavabı gözlərim üzümə tüpürürdü
sanki... Bir zamanlar bir qız vardı... hər dəfə sevdiyi ilə görüşə gedəndə gözləri
qızarmış və şiş olardı. Qorxulu heç nə yox idi, sadəcə uşaq vaxtı babasının hər
söz verdiyi hədiyyəni səhər almağa gedəcəyini bildiyi zamanlardakı kimi
sevincindən sabaha qədər yata bilmir, pır-pır edərdi ürəyi. Yenə böyük şövq ilə
görüşə gedir, həmin məkana çatmazdan əvvəl sevdiyinin hər “Hardasan? Gəlmirsən?”
sualında bir xoşbəxtlik yaşayırdı. Sanki daima əziyyətə alışmış qızcığaz xoşbəxt
günlərin çox uzun çəkməyəcəyini bilirdi. Təyin olunmuş görüş yerinə çatanda bir
musiqi səsi duyur, bu piano idi. Bu musiqidə sevdiyinin toxunuşu, ruhu vardı...
Oğlan həyatında sadiq qalacağı tək sevgilisi, musiqiylə sevişirdi sanki. Qızsa
gözlədi... son nota qədər... Daha sonra bir gün onu əlindən ala biləcək, o
musiqi sevgisinin təsiri altında qəmgin düşüncə və sevincli səs tonu ilə “Mən gəldiiim”
deyib boynuna sarılmışdı. Çox keçmədi, bəlkə də heç bir qadın sevgisinin edə
bilməyəcəyini musiqi sevgisi etdi. Və
o, nəinki o qızı, ona və özünə aid olan doğma-yad hər şeyi atıb musiqiyə
sarılıb onunla uzaqlara getdi... Oğlan xoşbəxt oldu, seçimində heç təsüflənmədi
(yəqin, belə görünürdü...), qızsa, hər gün musiqi səsi eşidəndə oturub
ağlayırdı. Musiqi ona çox şey verdi, yeni qadın, övlad (uğur), arzusunda olduğu
ölkələrdə gəzinti və daha nələr-nələr... Qıza isə bu ayrılıqdan qalan ancaq onu
unutmaq və uğur qazanmaq əzmi oldu... Və artıq o uğuru qazanmışdı da. Gözəl ailəsi,
sevdiyi işi, onu dəli kimi sevən həyat yoldaşı və övladı vardı.
Gecə düşmüş hər
kəs yatağına çəkilmişdi. Bu hissləri xatırlamaq onu çox narahat etmişdi. Ona
görə yox ki, həyatının böyük sevgisini unutmuşkən bir piano dili onu yenə
alt-üst etmişdi... Ona görə ki, bambaşqa və bütünlüklə onu sevən ərinə xəyanət
etmişdi, bu xatırlamayla sanki. Böyük sevgi və doğmalıqla ərinə sığınıb, dərin
nəfəslə bütün qoxusunu içinə çəkərək onu tək anlayan və heç vaxt tərk etməyən
sevgilisini məsumca boynundan öpüb sakit səs tonuyla “Səni sevirəm... bilirsən
də...” dedi... Həmişə olduğu kimi o qadınını anlamışdı... Dərin düşüncə və qələbə
hissi ilə onun saçlarından öpəndə qadın yuxuya getmişdi artıq... Bu yuxu özünə
verdiyi bütün suallara cavab idi...
Oyananda hər
şeyi anlamışdım. Naməlumluqla bitən sevgilərin, hekayələrin, filimlərin
hamısının cavabını bir gün mütləq tapacaqsınız... O vaxt elə bir vaxt olacaq
ki, axtarmaqdan yorulub, bezib, əl çəkdiyiniz, unutduğunuz gün sizinlə üz-üzə
dayanıb, “Mən gəldiiim” deyәcək...
Yazan: Aybəniz Ali